|
|
|
高街鬼屋消失的房間
高街鬼屋消失的房間
出o左名猛鬼的西營盤「高街鬼屋」，位於高街同東邊街交界、佐治五世紀念公園同高街警署附近，而家巳經改建成綜合社會服務大樓。「高街鬼屋」於一八九二年落成，原本用作外籍醫護人員宿舍。o係一九四一年日軍侵佔香港期間，被徵用作日軍憲兵部；第二年改為精神病院。自從一九七一年空置後，曾經兩度發生大火，以磚木建成o既結構大部分被燒去，變得更為殘舊。不過間屋越殘舊，就越吸引到一o的鍾意冒險o既人o黎呢度試膽。
阿君同阿言五個同學就係因為聽o左高街鬼屋o既猛鬼事𤂌而夜探鬼屋。佢o地諗o左一個試膽遊戲，規則係入鬼屋前事先預備四個空啤酒罐，由第一個入去o既人一次過帶晒所有空罐入去二樓o既第一個房間，亦即係傳聞最猛o既精神病鬼經常出沒o既地方，然後出返o黎。打後四個人就要依次序逐個入去搵呢間呢間房拎返一個空罐出o黎，邊個找唔到個罐，又或者用最長時間先出到o黎就要輸一餐飯。
阿君係第一個入去。當佢摸黑入到鬼屋裡面時，用電筒一照，見到裡面走廊掛o左一o的二十年代o既日曆同香煙廣告海報，望落去雖然係殘舊o左o的，但都唔係咁恐怖。
「死啦！唔記得o左間房o係幾多樓？求其去層算喇！」於是佢第一時間走上三樓。阿君用電筒四圍照時，發現三樓樓梯側邊掛o左一幅油畫，雖然幅畫大部份已經甩晒色，不過約略都見到畫上面畫o左一個歐州武士騎著一匹馬、坃住一枝武器。上到三樓，阿君逐間房入去睇，有o的房裡面乜都冇，但係有o的房裡面竟然有一個歐州式火爐。
「呢度都冇一間房似精神病房o既？都係落二樓喇！」阿君諗住沿住樓梯行返落二樓。
正當阿君想走之際，點知一轉角就突然發現到目標房間。「咦？頭先都唔見呢間房o既？唔通眼大睇過界？」行到入房裡面，阿君好強烈咁覺得呢間房真係住過精神病人。因為房間四邊牆都鑲o左好厚o既夾棉層，就好似電視上面見到o既精神病房一樣。不過房裡面o既其中一邊牆就零零舍舍出現一個大窿，望落去就好似夾硬俾人扯開一個窿咁。
「呢間房裝晒厚綿，一定係住精神病人啦！」於是阿君就放低所有空罐，然後返出去屋外面。
出到去屋外，阿君即刻同其餘四個人講已經將罐放o左o係二樓轉角第一間房。之後阿言等四個人就分別逐個出發。但好奇怪，佢o地四個入去搵完之後，都異口同聲話搵唔到阿君口中那間房，更加見唔到四個空罐。
「唔係呀你o地？四個都咁鬼無用，係咪根本冇行過去，又扮晒搵唔到呀！」阿君講。
「講你又唔信！一齊去搵囉！咁叻搵間房俾我睇！」阿言四個好勞氣咁講。
於是一行五個人，浩浩蕩蕩又由阿君帶頭行入鬼屋裡面。
「o下！上o左樓梯轉埋彎咪係囉！都唔知點搵o既你o地！」阿君一路行一路講。
「你唔係話呢間就係呀？」阿言上完樓梯即刻用電筒照向轉角o既其中一間房。
阿君行到間房門口向裡面一照，真係發現呢間房同其他房一樣，絕對唔似之前見到o個間裝晒厚綿o既房。
「唔通行錯？」阿君行返出去房門口望一望，的確係二樓轉角第一間房，冇理由會錯。於是佢o地五個人不斷o係鬼屋內轉來轉去，但係行勻成間屋，都係搵唔到阿君話放低空罐o個間房。
「不如算啦！走喇！」阿言終於提出放棄。之後五個人立即離開鬼屋，順手截o左架路過o既的士就返落灣仔。
o係車上幾個人當然不斷咁討論唔見o左o個間房，突然間個司機插嘴：「你o地九成撞鬼啦！聽附近o的行家講，好多行家都載過一o的探險o既人，佢o地都好似你o地咁見到一間房，之後又搵極都搵唔返。我都問過人，有個師傅話呢層樓根本唔存在，見到o既其實都係鬼掩眼，你o地走得返出o黎又冇事都算好彩喇！」
聽完個司機咁講，五個人都嚇到你眼望我眼，面都青埋。不過究竟佢o地邊個俾鬼掩眼呢？係阿君？定係之後再入去時，五個人一齊撞鬼呢？
高街鬼屋猛鬼傳說
1.日本人佔領香港期間，曾經o係高街附近進行「大屠殺」，據說地庫冇停屍房。有好多走去探險o既人都話曾經o係地庫裡面見過鬼，嚇到即刻走返出大街。
2.位於鬼屋對面o既佐治五世紀念公園亦係熱門鬧鬼地點。抗戰時公園曾經用作亂葬崗，甚至有人慘被活埋，自此呢度經常傳出鬧鬼。傳說有一名o係公園內露宿 o既老伯，有一次o係該公園露宿時，明明睡o係長椅上面，但第二朝睡醒，竟然發現自己睡o係地下。自此連佢都唔敢再o係度睡。
3.亦有人入o左裡面其中一間房，見到房入面有張爛溶溶o既病床同雜物。但當佢想離開間房時，竟然發現入o黎o個個門口已經唔見o左，變成一道牆。結果嚇到o個個人由窗爬出屋外。
4.傳說呢度有一層樓會突然出現。好多人行極都搵唔到呢一層，但係亦有人會唔覺意上o左呢呢層會消失o既樓層，而呢個人亦會自此失蹤，直到佢o既屍體被另一批探險者發現。
|
|
|
